ارجو مساعدتي [الأرشيف] - منتديات نسائيات النسائية

مشاهدة النسخة كاملة : ارجو مساعدتي

همسه دلع

10-16-2008, 06:29 AM

السلام عليكم ورحمة الله وبركاته

اولا حابه اعرفكم على نفسي انا فتاه من السعوديه عمري 25 خريجه كليه قسم دراسات اسلاميه

مشكلتي صراحه مدري كيف بقولها بس بالعربي انا طفشت من حياتي

مافيها تجديد مافيه نشاط مافيها تسليه

يومي مثل امس مثل بكره مافيه اي تغيير

انا عندي اخت وحده وزي عدمها والله اني طفشاااانه حيييييييييل

طفشت من التفلزيون طفشت من النت

احنا عائله صراحه مانطلع كثير وخااااصه زيارات الاقارب ماعندنا يعني شبه معدومه

زميلاتي كثير والحمدلله بس تمر السنه وانا ماكلمت الوحده فيهم

اخذت فتره اتصل عليهم اكلمهم بس هم مايتصلون صرت انحرج ادق عليهم

اختي اروح عندها بغرفتها اسولف معها ماهي فاضيه لي كل مارحت لها تطنشني وتجلس تطقطق على الكيبورد مع زميلاتها وبالمنتديات
حتى يوم تسوي لنفسها شي اكل مثلا او شاهي ماتفكر تنادي اختها الوحيده لو مجامله هي طيبه صراحه بس مدري ماتهتم بتواجدي وكلامي واحتياجي لها كاخت احيانا اروح لها اقولها طفشت من النت تعالي نجلس بالصاله ولا نطلع السطح نتقهواء ونسولف

تقولي طفشتي من النت لاتدخلينه خلاص وتتركني وترجع تطقطق على الكيبورد واقوم اطلع من عندها وانا دمعتي بعيني

امي مشغوله شوي عني ولو جلسات معها مافيه سوالف مشتركه بينا للعلم امي طيبه وحبوبه

عارفه ساعات ايش يجي براسي

اقول خليني ادخل شات واجلس اتكلم مع شباب وبنات المهم اتسلى بس اقول لا واخاف واشيل الفكره من راسي

وساعات اقول ليه ماكلم احد بالجوال بنت ولا ولد اي احد المهم اتكلم وبعد اخاف واشيل الفكره من راسي

بس اخاف يوم من الايام يتغلب علي الشيطان

استفغر الله بس والله يبعد هالافكار من راسي

ادخل نت الاقي اخوات لي تعرفت عليهم عن طريق المنتديات النسائيه

بس اغلب الاحيان مافيه احد كلهم مشغولين بحياتهم

ادخل المنتدى خلاص ملينا من يسلموو ومشكوووره مافيه شي مسلي

المشكله اني ماعرف اشكي لاحد من زميلاتي لو عبر النت ماحب اقول لاحد على مشاكلي
اخذت فتره اقراء رويات وقصص اللي بالمنتديات هي مسليه صراحه بس مشكلتها تضيع الوقت وتعور بالعين لانها كثيره وطويله

ساعات اجلس ابكي من الطفش والملل بس وش اسوي مافيه شي مفيد

وظيفه للحين ماجاء اسمي واي وظيفه غير التدريس اهلي رافضينها

ادري والله طولتي بكلامي بس عشان اوضح كل شي من جميع النواحي

واحس مشكلتي تافهه بس والله اتمنى احد يعطيني حلول اراء

همسه دلع

روح الشمال

10-16-2008, 07:02 AM

مرحبا اختي

همسة دلع

حياك الله بين اخواتك

اختي اولا اقول لك احمدي ربك عالنعمه لانه اهلك موفرين لك كل شي وغيرك من البنات محرومين من كل شي

ثانيا غاليتي نظمي وقتك واشغلي وقت فراغك بهوايه تحبيها مثل القراءه او الرسم

وبما انك بنوته اموره ادخلي قسم العنايه بالبشره والشعر وحطي خلطات تفيد بشرتك وتكوني اموره

وبما انه تخصصك دراسات اسلاميه وماتوظفتي ليه ماتعطيننا دروس نستفيد منها وتحصلي منها ع الاجر ومنها تستمتعين

حبيبتي في بقسم نسائيات كافيه قعده مخصصه تعالي سولفي مع البنات

والله يرزقك بالوظيفه باذنه تعالى عاجلا غير اجل

.................................................. ............

اختي ممكن اعرف كم عمر اختك؟؟

همسه دلع

10-16-2008, 07:16 AM

هلا بك اختي روح الشمال

اشكرك خيتو على الرد وسرعه الاستجابه

والله الحمدلله اقول الحمدلله بدال المره مليون مره

والحمدلله على الصحه والعافيه قبل كل شي

اتمنى اني اسوي شي مفيد واحد يستفيد مني

بس وين وانا ماشوف احد يمر اليوم كله وانا ماشوف احد غير الاهل طبعا الله يخليهم لي

انا اقراء رويات عبر المنتديات وتعجبني صراحه بس مشكلتها يبيلها احد فاضي ووانا من النوع اللي ماصبر اكملها بكره لازم اخلصها بيومين ولا ثلاثه

وانا عندي خبره بسيطه بالفوتو واحب اتعلم واطبق بس بيني وبينك اطفش منه وامل خاصه اذا الدرس ماتطبق معي ولا البرنامج كان ثقيل شوي

انا حابه اسال لو فيه بنات من حالي عاطلين كيف يقضون وقت فراغهم

واختي عمرها 27 اكبر مني بسنتين

انا بقولك ياختي الكريمه قبل فتره ماكان عندنا نت وكنا اناواختي نفس الشي عاطلين وماورنا شي

بس مستانسين نجلس ونسولف ونسوي كل شي مع بعض ونتساعد

اول ماحطينا النت ماكانت تنشغل عني كثير كان فيه وقت نجلس ناكل نسولف ونجلس على التلفزيون مع بعض

الحين ولا شي كان كل وحده عايشه بمكان منعزل واحنا في بيت واحد

روح الشمال

10-16-2008, 07:38 AM

*أميـ الإبداع ـرة*

10-16-2008, 01:28 PM

هلا وغلا هموسه

يالغاليه حنا خوات ولازم نساعد بعضنا

قسمي الاسبوع

مثلا السبت اعزم الجيران

الاحد اجلس مع الوالده واسمع منها قصص اجدادنا

الاثنين اعمل حلى وانادي اختي واجلس واسولف معها لو ساعه وحده بس

الثلاثاء تخططون لطلعه مثلا للحديقه او تتمشون لاي مكان

الاربعاء تكوني مكلمه صديقاتك قبل بفتره وتعزميهم عالبيت

وبما انك شاطره بالفوتوشوب

البنات مومقصرين هذي دوره حاطينها البنات بصراحه سهله

اضغطي هنــــــــــــــا (http://www.nsaayat.com/showthread.php?t=7209)

واذا ع اختك حبيبتي هذا من الفراغ اللي فيها

حاولي تجيها بوقت تكون رايقه وناقشيها بموضوع ادمانها ع النت وانصيحها وقولي لها ماتشتقي لجلستنا مع بعض

ادري بتتعبين لان الدمان مصيبه بس لاتياسين يالغاليه

واذا احتجتي اي مساعده انا موجوده

ماشاء الله عليكِ يا روح يا عسل عليكِ أفكااار رووعـــــه

الصراحه بعد الكـــــــللام اللي قلتيه ماأحد يقدر يتكلم << غطيتي علينااا

وحتى أناا ياهموسه مثلك أحيـــاانا أحس بطفش بس أحااول أشغـــل نفسي بأي شيء

وبعدين حبيبتي المزاج يتقلب يعني طبيعي إنك تحسين في يوم إنك طفشاانه وزعلانه مرره

بدون أي سبب وفي اليوم الثاني تحسين إنك مستانسه ومرتااحه وبدون سبب وااضح وهذا شي عاادي

وأناا أنصحك لمـــاا تحسي بإحســـااس سلبيي إنك تقرأي قرآآن أو تصلي بخشووع صدقيني راحه مابعدهاا

رااحــــــــه ,,, ومشكووووره روح مرره ثانيه الحقيقه كلاامك أفــــــاادني كثيير ,,,:30:

يارين

10-16-2008, 02:48 PM

ماشاء الله روح الشمال ماقصرت

واميرة الابداع من اسمها ابداع

اختي الغاليه

اولا ارحب بك معنا

واحنا خواتك مثل اختك بالضبط

احيانا الوحده يضايقها الفراغ وخاصه اذا عطله طويله او غيره

زي ماقالت روح قسمي الاسبوع واذا ماتقدرين

انا بقولك على طريقه يمكن انتي بتقولين ياكثر ما اسمعها بس بجد

عندي صديقه مثلك تخرجت قبلنا وخواتها كلهم متزوجات ولوحدها بالبيت امها تطلع عند اخوانها او خواتها او رفيقاتها في النهار وباليل بعد العشاء تنام

البنت يضيق صدرها بجد وتتمنى لو وظيفه ومثلك اهلها مايرضون بغير التدريس

نصحناها تسوي لها اشغال بالبيت وتنشغل بنفسها بس تقول ساعه وحده تكفي في الاهتمام بوجهي وشعري ومن هالكلام

قلت لها :

انتي بالصباح تنامين ,,وماتصحي الا الظهر صلي واجلسي مع الوالده (غداء ولا قهوه ولا فطور الى العصر )
امك راح تنشغل بعد العصر واذا جالسه اجلسي معها وافتحي سوالف وسولفي على راسها

اذا مليتي ممكن تتفقي انتي وياها وتروحون تتمشون واذا مو فاضيه هي

انتي روحي لمكان هادئ وحلو وابدي اشتغلي على نفسك بالتمارين الرياضيه الى ان يأذن المغرب
وبالليل بعد العشاء ادخلي على النت ساعه ولا ساعتين واجلسي شوي استفيدي

بعدها نامي واصحي قبل الفجر عشان تصلي الوتر

او قبل تنامين

الوتر من ثلاث الى احدى عشر ركعه ,, صلي اللي تريدين

وادعي بالسجود باللي تتمنين (صدقيني لذه ومتعه في عبادة الله لكن ماراح تحسي فيها الا اذا كررتيها ايام عباده وليست عاده
بعدها اذا سلمتي اجلسي ادعي وبإلحاح ان الله يرزقك باللي تبين (وظيفه , رزق , رضاء الوالدين ,زواج )
واستغفري كثير من مائه الى ماتشائين الف ولا اكثر

(فقلت استغفروا ربكم انه كان غفارا)

الاستغفار يشرح الصدر ويزيل الهم والكدر ويرزق الله عبده وينعم عليه

استغفري الى ان تغفو عينك الى النوم وعندما يأذن الفجر صلي ونامي

واكثري من هذا الدعاء صدقيني كرريه في اليوم اكثر من خمس مرات

وهو : (( اللهم إني اعوذبك من الهم والحزن والعجز والكسل وغلبة الدين وقهر الرجال ,, اللهم اني اعوذبك من قلب لايخشع وعلم لاينفع ودعوة لا يستجاب منها))

((لا إله إلا انت سبحانك إني كنت من الظالمين))

(( اللهم اكفني الحزن والهم بماشئت واجعلك في نحره واعوذ بك من شره ))

تواصلي مع اختك وانصحيها

ولا تنسين نحنا هنا خواتك

وشاركينا بقعدة البنيات وحريم

الله يوفقك ويبعد عنك كل هم وحزن

فراشه شفافه

10-16-2008, 10:02 PM

::3::

اهلين حبيبتي همسة دلع

منوره نسائيات بوجودك بيننا

البنات ماقصروا الله يعافيهم ويسعدهم

اول حاجه لازم تنظمي وقتك وتشغلي هذا الوقت باشياء عديده

يعني مثلا في البدايه نظمي نومك

واعملي جدول يومي واسبوعي وشهري
للاهتمام بنفسك وغيره

تقدري تخلي ساعتين او ثلاث ساعات للنت عشان ما تملي

و تقدري تمارسي هواياتك ع النت كمان

انتي عندك خبره بسيطه في الفوتو طوريها اكثر واكثر
ادخلي دروس وطبقيها مو شرط من اول مره
حاولي مره واثنين وثلاثه وصدقيني راح تحسي بمتعه

اتواصلي مع صديقاتك ع النت وراسليهم اطمني عليهم

وممكن تسولفي معاهم زي ماقالولك الاخوات

حتى صديقاتك اللي برا النت لازم تسألي عنهم بين فتره وفتره وما تقطعيهم
يمكن تكون عندهم ظروف مانعتهم مثلا انهم يكلموك كثير

ولازم تعرفي حبيبتي ان النت مو كل شيء
في اشياء كثيره تقدري تمارسيها زي الرياضه
اقرأي قرآن , اقرأي كتب مفيده في تطوير الذات

واختك يمكن هالفتره عندها هوس وادمان نت لكن بعد فتره بتطفش وتمل

انتي حاولي تتقربي منها اكثر بطريقه غير مباشره

وفي الاخير لا تنسي الدعاء في السجود والاستغفار

ولو احتجتي اي شيء لا تترددي كلنا هنا اخوات

اتمنى لك التوفيق والسعاده

دمت بخير

::1::

زهره فواحه

10-20-2008, 07:36 PM

حبيبتي همسه دلع

وصلتي ان شاء الله للي يرشدك

الاخوات ما قصروا الله يجزاهم وياك الجنه

مشكلتك هذي الكثير يعاني منها حتى انا كنت اعاني منها

بالرغم من اني متزوجه وعندي اولاد

بس الملل من حياتي و من الروتين اليومي

بس الحمد لله اهتديت لطريقين

اولهم سجلت بدار لتحفيظ القرآن

وثانيهم مارست هوايتي بالكتابه

جربي وسجلي في اي تحفيظ ترين سبحان الله

الله يفرج عنك وراح تشوفين

ومارسي هوايتك المفضله

ولا تنسين تكثرين من الاستغفار

لي صديقه تعرفت عليها بالدار

تخرجت من الثانوي وما قبلوها بالكليه في اول سنه فراحت وسجلت بالدار

وقالت انا متعوده دايما اطلع ما اقدر اجلس بالبيت

وما شاء الله حفظة القرآن بسنتين

والحين صارت معلمه بالدار وتدرس بعد بالكليه

وتقول ما عندي اي فـــــــــــــراغ

بالنسبه لاختك زي ما قالو الاخوات حاولي تتكلمين معها وتعزميها على شي من صنع ايديكي:12:

وياليت تعطينا دروس من الي درستيه بقسم ايمانيات كلنا شوق لكتابتك:59:

دمتي بود ::1::

زهره فواحه

10-22-2008, 08:20 PM

همسه دلع عسى المانع خير

فارسه ماتهاب

10-23-2008, 03:36 PM

الله يوفقك اختي دلع00

بماقصروا اخواتي معك00

بس ودي اركز على نقطه مهمه00

اذ انتي جعلت حياتك لله راح تتغلبين على كل شئ00

كلما زاد تعلقك بالله قل وقت فراغك ومملك وطفشك00

مثلا 00 بما انك درسات وش يمنعك تسوين حلقه ذكر في بيتكم تحفكم الملائكه 0000والارواح تتالف 00

لا تقولين صعب 00

اي شئ في البدايه صعب لكن بالعزيمه تقدرين00

مثلا 00 المراكز وش كثرها <<انتي محتاجه لصديقه تعينك على امور دينك ودنياااااااااك
ابحثي هما وهناك عن الصديقه الصالحه00

انتي وسعي صدرك ياوخيتي 00

وحولي حيااااااااااااااااتك الى تفاؤل :12:

حاملة هموم الامة

10-24-2008, 05:31 AM

حبيبتي
مرت بمثل ظروفك او مشابهة لك ولكن لم أكن هكذا مثلك
أختي اياك ان تضعفي لشيطان فولله لو اتبعتي هوه سيظلك
فربما هو يجعلك تشعورين بهذا الشعور ليجعلك من اتباعه
ولا تنسين انك من خريجه الكليه الاسلاميه
بامكانك قضاء وقتك على النت بتلخيص بعض المحاضرات او بعض الفوائد منها بامكانك ان تكون كاتبه
والله اني لم اكن اعرف ماذا اقضي وقتي فذهبت الى دفتري والآن ولله الحمد بدات اكتب
عليك اخبار اختك بما في داخلك فلربما تقضي معك وقتا
(( إن النفس لأمارة بالسوء إلا ما رحم ربي ))
كلنا أحياناً نسقط عن الطريق في لحظة ضعف أمام هوى النفس !
إبليس والدنيا ونفسي والهوى **** كيف الخلاص وكلهم أعدائي ؟!!
لكننا رغم كل هذا نظل محكومين بإيماننا المطلق بالالتزام أخلاقاً وسلوكاً وتفكيراً !
ويظل الخطأ والشطط سقطة عابرة لا تقوى على الاستمرار في ساحة الخلق والإيمان والصدق !
(( إن الذين اتقوا إذا مسهم طائف من الشيطان تذكروا فإذا هم مبصرون )) الأعراف
اللهم اغفر لنا جميع ما مضى من ذنوبنا واحفظنا في ما بقي من أعمارنا وارزقنا أعمالاً زاكية ترضى بها عنا
اللهم آت نفوسنا تقواها وزكها أنت خير من زكاها أنت وليها ومولاها
اللهم آآآآآآآمين

همسه دلع

10-24-2008, 07:09 AM

الله يسعدكن وربي كلامكن ريحني كثيررررررررر

حسيت ان لي اخوات كثير مو وحده بس

اول شي اعتذر عن غيابي كل هالفتره بس والله تعبانه لي اسبوع زكام بس الحمدلله

الحين صرت احسن دخلت من يومين بس مادري كان فيه مشكله ماقدرت اكتب رد وطلعت

وانا صراحه احب اكتب خواطر صحيح ماهي بمستوى رائع بس على قد حالي

بس تدرون وين المشكله اني استحي اكتب واحد يشوف وش اكتب

اخاف يقولون لو كتبت كلام حب اكيد فيه سبب واقفل دفتري واترك الكتابه

يمكن بعدي عن الله هو سبب ضيقتي لاني صراحه الصلاه بس الفروض ماصلي

اخر الليل وماكثر من الدعاء وخاصه الثلث الاخير من الليل

وان شاءالله راح اخلي ليلي كله للتقرب من الله والدعاء

ولي عوده اخواتي اوفيكم بالاخبار :)

واشكر كل من زارة موضوعي واضافه لمسه عليه بالنصيحه والدعاء لاختها في الله

واعتبركم زي اخواتي واتمنى تكون بينا صداقه ومحبه اخويه ومع الايام ان شاءالله بنكون اقرب لبعض والله ينفعني بكن وينفع بي

فراشه شفافه

10-24-2008, 10:01 AM

اهلين حبيبتي همسة دلع

سلامتك ماتشوفي شر يارب

سعيده لانك استفدتي من النصائح
وكانت سبب لراحتك الحمد لله

وان شاء الله تداومي على قيام الليل والاكثار من الدعاء

وحابه اقولك مو شرط تكون خواطرك على مستوى عالي جدا من الكتابة

لان هي في البدايه احاسيس ومشاعر ترجمت بطريقتك
فلا تستحي من كتابة الخواطر
بالعكس الكتابة شيء جميل ورائع وحساس

اتمنى نشوف من كتابتك على صفحات نسائيات

دمت بخير وسعاده

حاملة هموم الامة

10-24-2008, 03:50 PM

سلامتك ماتشوفين شر
أختي البدايه خطوة انت ابدي فقط استعيني بالله اياك والاستهانه بالصلاة فهي خير معين لك على الخير
عليك بقيام الليل وولله ستجدين راحة عظيمه
عليك ايضا بتلاة القران اجعليه خير جليسك
اياك ان تجعلي الله اهون الناظرين اليك
وفقك الله وثبتك

أم حصوصي الحلوة

10-24-2008, 04:08 PM

هلاوغلا يا عسل
اعتبرينا خواتك هنا في المنتدى
واي سؤال تحت امرك يا قمر
وانت سوي لك عالم خاصة بك حطي لك برنامج ديني وترفيهي
واندمجي معنا في المنتدى الرائع بتلقين هنا اخوات ما فيه احلى منهم وبتلقي نفسك تنبسطين معهم تلقائيا
ووسعي صدرك وابتسمي وبتتحسن نفسيتك صدقني

زهره فواحه

10-27-2008, 10:45 AM

الحمدلله على السلامه همسة دلع

منووووووووره

سعيده جدا جدا من كلامك

يعلم الله فرحت لك من كل قلبي

وما عليك من احد اكتبي خواطرك ومو شرط تكون متميزه

وننتظر كتاباتك في نسائيات وكلي شوق

اسعدني جدا تقربك من الله واصلي ان شاء الله فيه راحتك

اتمنى لك حيات سعيده

درموزة

10-31-2008, 03:03 PM

شوفي ياهمسة دلع لما قريت القصة أستغربت وكأنك تسولفين عني مع أختلافات بسيطة أنا كنت مثلك ولا عندي نت ولا غيرة وكل ماجيت أسولف أحس ماحد مهتم وترا مثلك أنا لي أخت وحدة وهي مدرسة وأنا مثلك متخرجة وقاعدة أول شي لازم تسوينة وهذى طريقة أنا جربتها شاركي أختك بالأشياء اللي تحبها يعني أنتم بينكم شي مشترك النت تكلموا عنة وأفتحي الموضوع وكأنك تبينها تساعدك بشي وخليها تفلسف علي راسك وصدقيني راح تنفتح المواضيع تلقائي وبعدأمك شوفي شنو المواضيع اللي تهمها وسولفي معها صدقيني راح تنجح الطريقة أنا أقعد بالساعات أسمع أختي وسوالف المدرسات السخيفة وأسوي نفس مهتمة وأناقشها مع العلم أن قبل كذا كنت ان وهي بس هواش والحين كل شي انتناقش فية جربي طريقتي وماراح نتدمين أن شاء الله,,,,

rose honey

11-11-2008, 01:31 PM

مرحبا اختي همسة دلع
والله يا اختي انا اتأثرت كتير بكلامك لأني عندي مشكلة مشابهة لمشكلتك مع بعض الأختلاف
انا مصرية اعيش في الامارات منذ ذمن درست فيها حتى انهيت دراستي الثانوية
وكان يجب ان اعود الى بلدي حتى ادرس ، ولكني لم استطع فأنا تعلقت بالبلد التي تربيت فيها وقضيت احلى ايامي فيها ولم استطع العودة وفي نفس الوقت كان من الصعب دخول جامعة هنا ، لقد حاولنا ولم نفلح
عمري الأن 20 عاما اجلس في البيت طول الوقت واشعر بالملل والضيق كثيراً ، يحاول اهلي التخفيف عني ولكني اشعر بوجود شئ ينقصني ، انا الأن بدون دراسة ، بدون اصدقاء ، بدون عمل ، وفي نفس الوقت لا اقدر على العودة الى بلدي لا اعرف ماذا افعل ؟ كنت اتمنى ان اخفف عنكي عزيزتي لكني عندي نفس المشكلة واريد من يساعدني ويجد لي حلاً !!!!!!!!!!!
:86:

همسه دلع

11-16-2008, 07:46 AM

والله ياخواتي اني فرحت جدا جدا جدا لردودكن
وحسيت اني من جد محتاجه اخوات لو عن طريق المنتدى
بس فعلا لقيت فيكن روح الاخوه والمحبه اللي افتقده
والحمدلله اني صرت احاول اشغل حالي باي شي صحيح
اني للحين اتضايق بس احاول اغير روتيني يومي
ادخل المنتدى ساعه مثلا ادخل العاب فلاش ساعه
ادخل اقراء قصه ساعه اطلع من النت ساعتين تقريبا
يعني موعد تجهيز اخواني للمدرسه
قبل الفجر اطلع اصلي ركعتين وبعدها اصلي الفجر
بالليل احاول استغل وقتي بالدعاء واتمنى من الله يقبل دعواتي
يعني ماصرت اجلس كثير بس كذا مبحلقه على النت بشي واحد عشان مامل مثل اول
الشي الوحيد اللي ماتغير اختي مررره مشغوله بالنت
اقولها نجلس لو ساعه بالليل مع بعض ونترك الجهاز
تقول صحباتي ومشغوله تعالي انتي عندي اروح كني اكلم نفسي واطلع بس احاول اشغل نفسي مثل ماقلت لكم
بس احلى شي اني كسبت اخوات هنا وحسيت بدصق مشاعركن الله يسعد كل وحده ردت على موضوعي وينولها مرادها ويحقق لها امانيها
حبيبتي نايس والله مشكلتنا كلها الفراغ بس صدقيني نصايح الاخوات جدا رائعه
واهمها صلاه اخر الليل مع الدعاء لله سبحانه وتعالى
سبحان الله يجعل في النفس طمانئينه عمري ماحسيت فيها
وانا مثلك احس بفراغ كبير
بس الحمدلله احس الحين مرتاحه اكثر من اول
الله يعينك حبيبتي على مشكلتك ويفرج همك

ღبــنــ الرجال ــتღ

11-16-2008, 08:10 AM

همسه دلع

قسم بالله قريت موضوع على بالي انا الي كاتبته قسم بالله نفس الحاله

وياشينه الروتين البيت بس انا ماكملت الدراسه خخخخخ

ممكن اتعرف عليك

نودى

12-01-2008, 10:57 PM

عزيزتى وأختى همسة دلع
اننى مثلك تماما أعانى من الملل أحيانا وأجلس وحيده بغرفتى لكننى لا أحاول أن استسلم طويلا لتلك الحالة بل احاول دائما ان امارس هواياتى التى اعشقها مثل قراءة الشعروالاستماع الى الموسيقى حاولى ياحبيبتى ان تتواصلى مع اختك وان تقتربى اكثر منها وتحاولى ممارسة هواياتك التى تحبينها وفقكك الله ومهد لك طريق الجنة

همسه دلع

12-06-2008, 06:32 AM

تسلمين حبيبتي على النصيحه

ربي مايحرمني هالاخوات اللي ردو في موضوعي

حبيبتي بنت رجال هلا بك ويشرفني صداقتك