دورة كيف تكسبين محبوبك للمتزوجات و المقبلات على الزواج [الأرشيف]

ام نوف

10-17-2007, 09:18 AM

السلام عليكم ورحمة الله وبركاته

هذه الدوره منقولة من أحد المنتديات النسائية وحبيت أنقلها لكم لأهميتها
ولكن لا تنسون الدعاء لصاحبة الموضوع وجزاها الله عنا خير الجزاء لإهتمامها
في كتابة ما يفيد أخواتها المسلمات ...أما أنا فمجرد ناقلة للموضووع فقط .....

]|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

توجهيها :

لكل متزوجة / لكل مقبلة على الزواج / لكل فتاة أرادت الإستفادة ..

هدفها:

كسب الزوج الحبيب بطرق عملية سهلة و بسيطة ..

أدواتها : ورقة و قلم / متابعة / إرادة و تنفيذ ..

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

خلونا نبدأ دورتنا بـ (( الحب ))

إحنا كحريم و كبنات و كأناث عموماً الحب هو الغالب علينا و متملكنا .. حبنا للأهل للوطن للأحبة ..

بس كثير من المتزوجات يجهلون حبهم لأزواجهم .. فعشان نكون على بينة كلنا .. راح نعرّف (( الحب ))

الحب عندنا نوعين :

1- حب مطلق

يعني تحبين بدون حدود و بدون شروط و بدون قيود .. مطلق عام ..

2- حب مشروط

يعني كأنك تقولين لزوجك ( راح أحبك بس / إذا اشتريت لي حاجة معينة أنا أبغاها ... ) ..

*
*

لو جينا للنوع الأول : الحب المطلق :

هذا هو الحب المطلوب منك كزوجة .. تحبين زوجك حب مطلق .. و لا تخلين أي عائق يواجهك في الحياة يمس شي بسيط من ذاك الحب ..

يعني اتفقتي معاه على إنه يجيب لك شغلة مهمة .. و لما رجع للبيت قال لك : اوووو نسيت ..

مثل هالموقف لا تخلينه يأثر في حبك أو يخليكي تكرهينه .. أنتي يمكن تكرهين التصرف نفسه

لكن ما تكرهين زوجك .. و في فرق أكيد .. لأن في قاعدة تقول :: فرّق بين الفعل و الفاعل :: إحنا نكره أفعال أو تصرفات معينة اصدرت من قبل أشخاص لكن ما نكره الاشخاص أنفسهم ..

أكيد من خلال جلساتكم .. صادفتوا و سمعتوا فلانة تقول : ( بديت أكره زوجي لأنه مهمل بيته ) و المفروض إنها تكره إهماله مو تكرهه هو ..
عموماً :: ابي كل وحدة فيكم تقول و تردد بينها و بين نفسها

( أنا أحب زوجي لذاته .. و ما راح أخلي أي تصرف طارئ يهز شي من حبي له )

الطيبون للطيبات .. و الخبيثون للخبيثات ..

سمعناها كثير .. هي قاعدة قرآنية يماثلها مثل دايماً نردده ( الطيور على أشكالها تقع ) تعرفونه أكيد .. و في قاعدة روحانية تأكدها ( الأرواح المتشابهة تلتقي ) ..
لو جينا لحياتنا .. و أعطيكم على نفسي مثل :: أنا وسط أهلي و أستحقهم و يستحقوني .. ليش ؟ لأن إحنا أكفاء و متشابهين كثير ..

إرتبطت بزوجي .. لأنه هو اللي يناسبني .. بس من أي ناحية ؟؟ ناحية أرواحنا تتشابه ..

أنتي و زوجك .. ارتبطتوا ببعض .. ليش ؟ لأن أرواحكم متشابهة .. أنتي تستحقين هالزوج .. و هو يستحقك ..

مستواكي و مستواه متشابهين من أي ناحية ؟ ناحيةالمستوى الروحاني نفسه عشان كذا صار بينكم تجاذب

هذا التشابه يلغي الفوارق .. إحنا دايماً نركز على إن الشخص هذا وسيم و غني ... الخ يعني لازم ياخذ وحدة من مستواه المادي !! و نتفاجأ إنه أخذ وحدة مستواها المادي أقل منه ..

و سمعنا كثير ( أنا جميلة و جامعية و من عايلة لها مركزها ) و نشوف إنها تزوجت من شاب عنده ثانوية عادي بحياته الإجتماعية ..

دايماً ننهي إستغرابنا بإنه (( نصيب )) هو نصيب و الله كاتبه فعلاً .. لكننا غفلنا عن مسألة تشابه الأرواح .. يعني من اليوم و رايح لو شفتوا حالات مشابهة قولوا (( هذا نصيب و تشابه أرواح و الله سبحانه و فق بينهم )) ..

و في بنات تزوجوا من ناس أكبر منهم أو أغنى أو أكثر وجاهة ... الخ لكن مستوى الزوج هذا هو نفسه مستواها .. و حريم تطلقوا من أزواجهم و تزوجوا غيرهم .. و هكذا ..

طيب و الحل ؟

هم حلين :

1- تتكيفين مع الوضع الحالي .. و تحسنين من طرق التعامل .. و تمشين معانا لآخر الموضوع ..

2- إنكم تنضجون مع بعض عشان تحققون سعادة أكثر و فهم أعمق ..
إذا و لا حل اعجبك .. اطلبي الطلاق .. هااه وش قلتي ؟

قرري من الحين :

تبين تستمرين ؟ إذا جاوبتي بـ لا .. لا تنتظرين و اطلبي الطلاق .. بس تأكدي إن هذا نصيبك و هذا مستواك و ما راح تلقين أفضل منه من ناحية الروحانية ..

إلا إذا قررتي إنك تنضجين .. و أنا أنصحك إنك تنضجين معاه في نفس الوقت ..

و إذا جاوبتي بـ نعم .. اشتغلي على نفسك من الحين و إسعي عشان تحسنين و تعدلين من علاقتكم ..

الواجب الأول :

خوذي ورقة .. و كتبي عليها من فوق ( ورقة المفاهيم ) .. و بعدها اكتبي الجملة الجاية :

سأطبق جميع الواجبات و التمارين

هاذي حلقتنا الأولى من الدورة .. أتمنى إني قدرت أوصل لكم اللي أبغى أوصله ..

بس يا ليت من كل وحدة ترد .. تعطيني رأيها : أستمر أو لا ؟ و بتكون متابعة معانا أو لا ؟

*
*
*

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

الشرط الأول :: السعادة تبدا من الداخل ::

وشلون تبدا من الداخل ؟

يعني لا تظنين إن لما يكون عندك فلوس و صرتي غنية يعني لازم تكونين سعيدة

أو لما تكونين صاحبة أعلى الشهادات إذا لازم تكونين سعيدة

أو لما تكونين صاحبة مركز مرموق يعني لابد تكونين سعيدة

أو لما تكونين آية في الجمال يعني أنتي سعيدة

المال و الوجاهة و المناصب و الجمال ما هي إلا وسائل تعين بس ما تصنع السعادة أنتوا معاي ؟؟

بإختصار إذا ما كنتي سعيدة من من الداخل ما راح تحصلين على السعادة في الخارج ..

خليني أهمس في أذنك أختي العزيزة و أقول لك ( إذا ما كنتي سعيدة من الداخل ما راح تقدرين تسعدين زوجك و لا اعيالك و لا أي أحد من اللي حولك .. لأن فاقد الشي لا يعطيه ) ..

عشان كذاأقول لك خلي البداية منك و في نفسك .. تعلمي وشلون تكونين سعيدة حتى لو كنتي وحيدة ..

حريم كثير هم في الأصل مو سعيدين .. فلما تصير لهم مشكلة مع أزواجهم أول شي يسوونه يلقون اللوم على أزواجهم و إنهم السبب في عدم سعادتهم أو تعاستهم ..

*
*

عشان نتعلم وشلون نكون سعداء عشان نسعد .. أو تتعلمين اشلون تُسعدين عشان تِسعدين .. تابعوا معاي الفقرة الجاية ..

في نظرية ملخصها ( إيفاء حقوق 4 جوانب في الحياة ) .. و الجوانب هي :

الجانب الروحاني
الجانب الإجتماعي
الجانب العقلي
الجانب النفسي
خلونا نفسر النظرية و بإختصار شديد ..

تفسيرها : إن اللي بيعطي كل جانب من الجوانب اللي ذكرتها حقه بيكون سعيد بإذن الله ..

طيب الحين راح نوضح كل جانب و بشكل سريع :

الجانب الروحاني :: هو جانب معانيه عميقة جداً .. متصلة بالروح .. مثل الإيمان و التوكل و الإنتماء و القيم الإجتماعية ..

الجانب العقلي :: متعلق بالجانب الثقافي و العلمي و النفسي ..

الجانب الجسدي :: متعلق بالجانب الفسيولوجي البدني الجسماني ..

الجانب الإجتماعي :: هو المتعلق أكيد بالأسرة و العائلة و المجتمع ..

تذكرنا هالجوانب و إيفاء حقها بقول الرسول عليه الصلاة و السلام : || إن لربك عليك حقاً , و إن لأهلك عليك حقاً , فأعط كل ذي حق حقه || , و في رواية || و إن لجسمك عليك حقاً || ..

عشان تحققين و توفين كل جانب حقه .. وشو المطلوب منك كزوجة أو كأم ..

المطلوب : تقسيم الأعمال اليومية على الجوانب الأربع .. ساعة لربك و لعبادتك / ساعة للرياضة و النوم / ساعة للتعلم و القراءة / ساعة للأهل و الأولاد و العايلة .. لا تنشغلين بشي على حساب شي .. و بإذن الله بتكونين من السعداء ..

** ملاحظة : ما أقصد ساعة بمعنى ساعة و إنما وقت كاف لإيفاء جانب حقه لكن بشرط ما يطغى على وقت جانب آخر ..

*
*
*

بكذا .. نكون خلصنا الشرط الأول لتحقيق السعادة الزوجية ..

دورة : كيف تكسبين محبوبك ||,",|| للمتزوجات و المقبلات على الزواج ||,",|

نكمل شروط السعادة الزوجية .. ذكرنا الحلقة اللي فاتت شرط و هو :: السعادة تبدا من الداخل :: و عرفنا اشلون نُسعد عشان نسعِد ..

*
*

الشرط الثاني :: أنتي المسؤولة عن إسعاد نفسك ::

خلونا نتفق من هنا على إنك أنتي المسؤولة عن سعادتك محد غيرك ..

لا تعيشين في دائرة الإسقاطات اللي يعشيها الشخص الغير السعيد .. ( مب أنا المشكلة .. المشكلة إن زوجي .. أهلي .. المدير .. السحر .. الشيطان ... الخ هالإسقاطات ..

السعداء هم الذين تحملوا مسؤولية إسعاد أنفسهم

تذكري أختي الغالية .. إنك لما تبغين سلعة غالية .. أو شغلة باهظة الثمن .. راح تسعين بكل ما اوتيتي من قوة عشان تحصلينها و بالتالي تقدرين تتصرفين فيها ..

خلي سلعتك الغالية ( السعادة ) اللي تحتاج إلى جهد و تضحيات و صبر عشان نحققها ..و تحملي مسؤولية السعادة بنفسك و لا تلقين الحمل على الزوج و يصير هو المسؤول عن كل شي حتى سعادتك !!

قاعدتنا الأولى كانت :: السعادة من الداخل :: <<< خلك متذكرتها على طوول ..

الشرط الثالث :: عشان نغير في الغير .. لازم أبدأ التغيير من نفسي أول ::

خلوني أذكر لكم قصة قصيرة تتعلق بهالشرط ..

في رجل نوى إنه يغير العالم .. و قعد على هالحال 20 سنة .. لكن و لاشي تغيّر ..

قرر يغير دولته .. حاول و حاول 10 سنين .. لكن و لاشي تغير في دولته ..

فقال : خلني اغير في مدينتي .. و فعلاً بدا محاولات التغيير لمدة 5 سنوات .. لكن و لا شي تغير !!

قال خلاص بأغير في الحي اللي أنا أسكنه .. عل و عسى يتغير شي .. حاول و حاول و حاول

لكن ما تغير شي ..

انتقل بعدها يبي يغير في بيته .. و استمر في محاولاته سنين .. لكن و لاشي تغير !!

في الأخير أدرك إنه لازم يغير من نفسه و هذا اللي سواه ..

**

و أنتي عزيزتي .. بتنتظرين 40 سنة عشان تكتشفين هالحقيقة ؟؟؟ حقيقة إنك لازم تغيرين من نفسك ؟؟ أكيد لا .. من منا يضمن عمره ؟!!

عشان كذا أبي كل وحدة تقول :: أنا ما أقدر أغير زوجي أو أولادي أو أهلي أو صديقاتي ,,, لكني قادرة أغير في نفسي.. يمكن لو غيرت من نفسي .. يتغيرون هم تجاهي ::

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|**

كيف تتغيرين ذاتياً .. و تغيرين واقعك للأفضل

الجزء هذا راح يكون عبارة عن تمرين حلو و بسيط ..

هو تمرين فكري له مفعوله العجيب .. و من فوايده :

1- يخرج الشحنات السلبية من العقل الباطن .

2- يثبّت الأفكار الإيجابية .

3- يجلب القدر المطلوب لك .

4- يزيد الثقة في النفس .

5- ينبه إلى أمور معينة و غيرها مكبوتة ..

*
*

وشلون بنسوي هالتمرين ؟!

الطريقة جداً سهلة مثل ما ذكرت لكن تتطلب الصدق .. و تفضلوا :

1- اكتبي (( أنا أحب ..... " اسم زوجك " و هو يحبني )) و تلفظيها .

2- اكتبي أول ردة فعل في بالك بعد ما تلفظينها ,, أي ردة فعل .. سواء كانت إيجابية : " أنا فعلاً كذا " .. أو سلبية : " لالا يحبني و لا شي " .. أو محايدة : " يا ليت " .. أو ما لها علاقة : " كأني ما اتصلت في أمي اليوم ؟؟ " .. يعني أول رد فعل في عقلك ..

3- كرري الفعل 5 مرات .. يعني اكتبي نفس الجملة الأولى و بعدها اكتبي ردة الفعل الأول .. لحد ما تكملين الـ 5 مرات .. لكن لا تحللين حاجة ..

4- اكتبي الحين (( ..... " اسمك " تحب ..... " اسم زوجك " و هو يحبها )) و تلفظيها .

5- اكتبي أول رد فعل على طووول ..

6- كرري 5 مرات ..

7- اكتبي (( أنتِ " الخطاب موجه لك " تحبين .... " اسمه " وهو يحبك )) و تلفظيها ..

8- اكتبي أول ردة فعل ..

9- كرري 5 مرات بعد ..

** التمرين هذا تسوينه لما تكونين بروحك .. في خلوة و بدون أي مقاطعات ( لا تلفزيون .. لا تلفون .. لا شرب شاي ... الخ ) يعني تقعدين تسترخين على الآخر تفضين نفسك من أي عمل .. و تبدين في التمرين ..

و إذا صار و جا واحد من الأطفال يبغي حاجة .. أو زوجك وصل و قاطعك .. يعني حدث شي قطع التمرين عيديه من الأول ..

اتفقنا ؟

** الشي الثاني .. التمرين لازم تسوينه لمدة 14 يوم متواصلين .. إذا نسيتي يوم تبدين من جديد ..
يعني لو بديتي التمرين لمدة 10 ايام و نسيتي يوم واحد .. تعيدين التمرين من جديد ..

في اليوم إذا صار إنقطاع .. تعيدين التمرين نفسه .. يعني في اليوم الأول كتبتي و كررتي بدون أي إنقطاع .. جيتي اليوم الثاني .. و بديتي في التمرين لكن رن التلفون فجأة وقطع عليك .. عيدي الخطوات من رقم 1 ..

واااضح ؟

** لا تحللين ردود الأفعال .. اكتبيها بس .. و عقب حلليها لما تخلصين الـ 14 يوم ..

** إذا حسيتي إن المعلومات سرية تقدرين تتخلصين من ورقة التمرين في نفس اليوم أو لما تخلصين الـمدة 14 يوم ..

** إحتمال تاخذ الجلسة الوحدة من 10- 15 دقيقة .. كثير ؟ أكيد لا ..

*
*
*

مثال للتمرين .. للتوضيح أكثر :

الزوجة اسمها عايشة //// الزوج اسمه محمد ( اللون الأزرق = ردة الفعل )

1- انا احب محمد و محمد يحبني = بس إنه يتصرف و كأنه ما يحبني.

2-انا أحب محمد و محمد يحبني = كان يحبني في بداية زواجنا .

3- أنا أحب محمد و محمد يحبني = أتمنى لو تتحسن علاقتنا ..

4- أنا أحب محمد و محمد يحبني = اووو شهالتمرين ؟
.
.

عايشة تحب محمد و محمد يحب عايشة = يا ليت ..

عايشة تحب محمد و محمد يحب عايشة = يا رب ساعدنا هههه .

.

أنتِ تحبين محمد و محمد يحبك = كلام فاضي !.
.

و هكذا .. أتمنى وضح لكم التمرين ..

*
*
*

عايشة تحب محمد و محمد يحب عايشة = يا رب ساعدنا هههه .

.

أنتِ تحبين محمد و محمد يحبك = كلام فاضي !.
.

و هكذا .. أتمنى وضح لكم التمرين ..
أول الطرق :: حبي زوجك حب مطلق ::

تذكرون لما تكلمنا في بداية الموضوع عن الحب .. و ذكرنا أنواعه .. و منها :: الحب المطلق ::
جا الدور عشان نطبق هالحب المطلق .. وشلون ؟

يعني حبي لزوجي لازم و ركزوا على كلمة لازم .. يكون حب مطلق بدون قيود و لا شروط ..

حبي زوجك مهما صدر منه .. يمكن تزعلين / تعصبين / تنقدين / تحزنين ,, معه و عليه بس و لا شي

يأثر على حبك له .. و لازم تأكدين له هالشي ..

مثال على ذلك ::

زوج وقف امام ( المرايا ) .. و قال لزوجته : تخيلي لو أصلع ؟؟

ممكن تجاوبه زوجته ( اسم الله عليك توك صغير ) أو ( خل عنك الوسواس و إذا صلعت يحلها الف

حلال و ياكثر عمليات زرع الشعر الرخيصة و الفعالة ) و الأسوأ من هذا كله إنها تجاوبه ( لا ,,

لا تقول .. ما أقدر أتخيلك مصلع ) .. بس الزوجة الذكية و اللي تحب حب مطلق بتجاوب

( حتى لو صلعت يا حبيبي ما راح يتغير شي .. راح تكون محبوب مثل ما أنت الحين )

**

مثال ثاني ::

في يوم رجع الزوج من الدوام .. و سأل زوجته : وش بيصير لو ماعطوني ترقية ؟ .. زوجته ممكن

تجاوبه ( لازم تاخذ الترقية .. إحنا محتاجين للعلاوة المالية اللي بتطلع من وراها )

و الأسوأ إنها تجاوبه بـ ( وشوو ! من بكرة تروح تقابل المسؤول و تطالبه بالترقية )

بس المفروض إن الزوج يسمع (ابوفلان .. و لاعليك يا غالي .. هم الخسرانين .. راتبي و راتبك بيكفونا أو راتبك بيكفينا و بيزيد بإذن الله )

شفتوا الفرق ؟

كذا نبيك تكونين مع زوجك .. و كذا نبغي حبك له .. يكون حب مطلق ..

كلنا سمعنا عن زوجات تخلوا عن أزواجهم يوم فلسوا ! أو يوم ينسجن و يتخلى عنه المجتمع !

أو أو .. تأكدوا إن مثل هالزوجات .. ما اعرفوا معنى الحب المطلق و لا مارسوه ..

للمرة المليون أكرر :: حبي زوجك حب مطلق :: حبيه إذا أحسن و كافئيه بالإحسان ..

حبيه إذا أساء و كافئيه بالغفران و المسامحة .. حبيه إذا عطى و كافئيه بالشكر .. حبيه إذا قصر

و كافئيه بالستر ..

و حطوا في بالكم خواتي .. إن اللي تحب زوجها ما تتكلم عنه بالشينة مثل ما نقول في العلن و قدام

الخلق .. و لا تكشف له ستر .. و كلامها كله عنه بالخير ..

إذا الحب المطلق = سر الوجود

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

ثاني طرقنا :: انتبهي الزوج دايماً يختبر ::

من الحاجات اللي لازم تنتبه لها الزوجة .. إن الزوج يختبر حب زوجته له كل يوم تقريباً .. بوعي

و بدون وعي ..

أعطيكم مثال ::

تعطلت سيارة البيت اللي يستخدمها السواق عشان يودي الزوجة و الأولاد .. و اضطر الزوج في

ذاك اليوم إنه يوديهم لبيت أهلها و في الرجعة ترجع مع سواق بيت أهلها .. و هناك قالت أم

الزوجة : يا بنتي لازم تصلحون سيارتكم .. مب زين تظلون كذا بدون سيارة ..

و لما رجعت الزوجة البيت و اقعدت مع بو العيال قالت له : ( أمي تقول لازم تصلحون السيارة ) ..

ممكن هنا الزوج يختبرها عشان يعرف وزن كلمته عند أمها .. فيقول لها ( أنا أشوف إن نأجل

الموضوع شوي على الأقل لين الشهر الجاي أضمن إن السيولة المادية توفرت عندي .. اشرايك ؟ )

الزوجة لما ترد عليه ( بس عاد أمي قالت .. ) ما راح تنجح ..

لأن ردة فعله بتكون يا إما إنه بيعصب من خلال رده : ( يعني كلامي و لا كلام الوالدة ؟ ) .. أو

بيكبت .. و طبعاً ردة الفعل المكبوتة تكون أشد خطورة .. فإنتبهي عزيزتي الزوجة

و تذكري :: طاعة الزوج مقدمة على الوالد/ة و غيرهم شرعاً و عرفاً

|,",|| دورة : كيف تكسبين محبوبك ||,",|| للمتزوجات و المقبلات على الزواج ||,",|

نستكمل طرق كسب الزوج الحبيب .. و ذكرت طريقتين : حبي الزوج حب مطلق / كوني ذكية في إختبارات زوجك ..

ثالث طريقة :: كوني مستمعة جيدة ::

يجي وقت على الإنسان .. يبي من يسمعه .. و هاذي حاجة أساسية له ..

فما بالك بالزوج اللي محتاج أكيد لإنسانة تحبه و تفهمه و تسمعه لا من بغى يتكلم .. و تأكدي

عزيزتي إن الزوج لو ما لقى اللي يفهمه في محيط بيته .. راح يدور عن ذاك الشخص .. و يمكن

عن زوجة ثانية أو عن علاقة ثانية ! لا تستغربين و لا تستبعدين هالشي .. لذلك أنتي

اللي لازم تسمعينه و تفهمينه ..

نسمع عند حريم متزوجات من سنين .. و تلقين الوحدة فيهم تقول :: أنا ما فهمته لحد الحين ::

و أنا اقول لها .. متى بتقررين تفهمينه ؟ أو وش كنتي تسوين طول هالسنين ؟؟

و الصراحة اللي ما فهمت زوجها مهما كانت مدة زواجها .. اسمحوا لي أقول لها :: أنتي

ما تسمعين له عشان تفهمينه ::

تدرون خواتي .. إن السماع و الإنتباه واجب عليك كزوجة ؟

لأنه ليس من الأدب .. إن الزوج يتكلم سواء في موضوع مهم أو غير مهم .. و يتفاجئ بالزوجة

سارحة في عالم ثاني مثلاُ ! أو منشغلة بالطفل اللي بيدها أو المجلة أو أي شي ثاني ..

لذلك خواتي :: متى ما طلب منك الزوج الإنتباه .. انتبهي له و اسمعيه .. و لا تنشغلين بشي

إلا بعد ما تستأذنينه ::

يعني اعتذر منه و قولي له ( ممكن حبيبي نأجل الموضوع لوقت ثاني .. أو بعد ما أخلص الشغلة

اللي في يدي ) ..

على شرط لما تفضين .. ترجعين تسألينه عن الموضوع نفسه .. معاي ؟

و تأكدي عزيزتي .. إن الزوجة اللي ماتسمع زوجها و تفهمه راح تواجه متاعب عاجلاً أو آجلاً ..

لأن الإستماع فن .. تعلميه عشان تحافظين على زوجك للأبد

طيب وشلون اسمعه ؟

بسيطة ..

لما يدخل أسأليه عن شغله .. اسأليه عن طموحاته و إهتماماته ..

( ابو فلان ! وشو اللي تتمنى تحققه ؟ ) ( وشلون كان شغلك اليوم ؟ ) و الأمثلة كثيرة ..

لـــــكـــن انتبهي عزيزتي الزوجة ..

لا تكثرين من الأسئلة ..

يعني لو سألتيه و تجاوب معك .. استمري معاه لحد ما ينهي كلامه ..

و إذا ما تجاوب .. وقفي لا تسألينه .. لأنه يمكن يكون تعبان .. أو ما عنده رغبة في الكلام أو

مشغول في موضوع معيّن ..